diumenge, d’octubre 29, 2006

The days of way back

O soi lât a durmî a lis 5. Cul fat dal cambiament de ore (che no ai mai capît dal dut jo...) nol sameave tant tart; po si sin metûts a zuiâ a Risiko e il timp al è svolât. Miôr chel dal Monopoli, chel mi fâs propit rabiâ, piardi bêçs no mi plâs. Comunque, o stavi pensant che trê agns fa, chest periodi, o jeri biel che mi la gjoldevi in Californie. Za trê agns mi samee îr. O mi samee un insium. Chês spiagis mi son restadis dentri, in Friûl no son puescj dulà lâ sul mâr e cjalâ cence vê nissun atôr. Boh, forsit di unviar. Però lì tu viodevis propit l'ocean, un spazi che no tu sâs dulà che al finìs e dulà che al è scomençât. Al jere compagn ancje in Portugal.. al è naturâl che vint simpri sot dai voi che viste lì ti ven naturâl ti cjapâ la barcje e viodi ce che al è oltri. Cuissà se rivarai a tornâ a San Francisco. Là si cjate ancje la fumate, par cui o saressi a cjase, forsit juste un cuatri salidis masse ripidis ma par chel tu fasis l'abitudin. Trê agns. Ciert che se tu ti metis a cjalâ indaûr spes ti ven dome mâl al cûr. Miôr cjalâ indevant, sperant che al puartedi alc di bon

dimecres, d’octubre 18, 2006

Passade ancje chiste

Ancje il complean al è passât. Soi lât a mangjâ une pize cun chei de clas e dopo a bevi alc. Ae fin mi soi divertût. Comunque, crodi che chist al sedi il periot plui cuiet di cuant che o ai tacât cu la universitât. Nissun test intermedi, dome i esams a la fin. Par cui no tu âs un grum di pression, tu ti la puedis cjapâ un tic plui comude cul studi. Sperin no masse. Stoi ancje zuiant un biel pôc cul ordenadôr rispiet ai mês precedents. Soredut MicroMachines V4, ch'al è une figade di zuiâ cui amîs. E Toca Race Driver2 par sintîsi un pôc Schumacher. Dopo se un al è cojon lu fâs ancje te realtât. Jo dome ogni tant, no cuant che o passi pe place di Palme. Buenas noches

dimarts, d’octubre 10, 2006

Horatium

Siarin ancje cun cheste ode che e je bielone par me, se tu cjalis oltri il vers (abusât) dal carpe diem. Se us covente une traduzion, cirîtla su Google.
Tu ne quaesieris, scire nefas, quem mihi, quem tibi
finem di dederint, Leuconoe, nec Babylonios
temptaris numeros. ut melius, quidquid erit, pati.
seu pluris hiemes seu tribuit Iuppiter ultimam,
quae nunc oppositis el pene debilitat pumicibus mare
Tyrrhenum: sapias, vina liques et spatio brevi
spem longam reseces. dum loquimur, fugerit invida
aetas: carpe diem quam minimum credula postero.

O sin vecjos

Leint il messaç di chê altre volte al è cambiât un tic... o soi rivât a passâ mieç esam juste par dî di no vê dome piardût timp. Al è ancje rivât il frêt, un pôc in ritart, ma simpri compagn, culì e mancje dome la buere e dopo al sarès come il frêt furlan. Sabide e domenie mi soi a vonde divertût al jere un biel conciert in place Maiôr cun artiscj impuartants, e, come che disin, best of all, dut a gratis. E dut plen come simpri cuant che no si paie un franc. Sabide di sere o sin restâts sù dute la gnote par viodi la formula 1 e dopo Schumi al spache il motôr e dut al va in casin, po ben, al restarà simpri il plui grant di ducj par me cont. Fasint chest blog (o bloc a la catalane) mi ven simpri tal cjâf il stream of consciousness, il flus di cosience, che nus diseve simpri la nestre prof di inglês, cuant che nus fevelave di James Joyce. Parcè chest al è propite un flus, cui trê ponts cuant che no mi ven tal cjâf une robe e vie indevant. Il titul al è par vie che o fasi i agns. Sabide. 21 agns. Une altre piere impuartante. Viodarai di paiâ di bevi a cualchidun.
Ah, domenie a'nd àn fat di gnûf la partide di balon Catalunya-Euskadi. Bulos e bon.

dilluns, d’octubre 02, 2006

Life goes on

No mi visi se e jere une cjançon che faseve cussì... mi pâr di sì... si tire indevant, o stoi vint cualchi delusion dal mont Internet furlan, ma ancje cualchi sodisfazion. Par chel che conte pardabon, la universitât, mah. No soi tant fiduciôs, un tic blocât, impantanât. Il brut al è che al samee che ducj a fasin esams a manete, a son in pari e bravonons. E jo l'unic coion. O ai simpri plui voie di finî parcè che a la fin al è un grum di stress, ancje se tu ti divertissis un pôc. Ogni tant o pensi di jessi stât masse braurôs, masse orgoglio, che se lavi a Triest o vevi za une lauree in man. Ma jo no soi par lis robis facilis. O soi un cjavon, che al impare dome sbaliant. E chest al è bon a voltis e une sfighe altris voltis. Il timp intant al è estîf. 25 grâts, robis di jugn, une biele buerute, ancje di sere. Nol è neancje mâl, prime o dopo mi insumiarai di chest timp cuant che fûr al sarà umidon e un fumaton di no viodi neancje la curve a cent metros dal mê barcon...