dilluns, de maig 29, 2006

Jugn al è za ca

ce biel ch'al è mai però. Lis seris cuntun pôc di buere mi plasin masse, stant lontan dal Friûl mi soi acuart che la buere e je une robe a cui sin usâts... parcè che, ca di me almancul, no je mai masse, simpri chel tant, che soredut di unviar jude a tignî lontan la fumate. Po ben, o ai fat un cuatri esams in chest periot, no sai ancjemò i risultâts, po al sarà un lunc fin setemane, grazie a la "fieste nazionâl"... jo no fâs fieste, ma une zornade di mancul in citât no je mâl. Ancje parcè che prest al rivarà il cjalt vêr e lì alore si patirà...
îr soi ancje stât a Mirabilandia, che par cui che nol sa al è un parc di divertiment dongje Ravenna... i zûcs cu la aghe a son i plui biei, e se tu sês in companie tu ti divertissis un grum

dissabte, de maig 20, 2006

Balon, furbos e cine

Sin di gnûf sot esams... ca no si finis mai. Intant tal balon al sucêt di dut, e dopo a disin che un nol à di vergognâsi di jessi talian... o cu lis scomessis, no capissi cemût che cussì tancj zuiadôrs cun dut ce che bechin e àn voie di riscjâ cussì. O sin al livel di tierç mont no miôr... ridin se sucedin in Vietnam o in Argjentine ma ca a si fâs di piês. Che altre sere o viodevi La meglio gioventù aka La miôr zoventût di Pasolini... biel cine ancje se mi mandin dome il prin toc e chel altri cuissà cuant. E un professôr di letaris mi pâr i diseve di lâ vie de Italie prime ch'al podeve... e o jerin tai agns 60, boom economic e dut il rest. Sperin di rivâ a passâ il confin prime che sedi masse tart

divendres, de maig 12, 2006

Big city life

Chestis citâts a son propit grandis. No covente lâ a Los Angeles o cuissà dulà, za une citât come Bologne e je grandone. Lu pensavi chê altre gnot suntun autobus, ch'al continuave a lâ viers fûr e a erin simpri cjasis ator. E dut al ere silenziôs cence traffic, ma biel, ancje se dut diviars rispiet ae Americhe, ca nol è che tu puedis zirâ a vueit in machine, no tu âs chilometros di autostradis (e chês che son tu lis pais masse). Mah, o stoi studiant pes provis intermidiis, sperin in cualchi bune gnove pe fin de prossime setemane, e che no sedin veris lis previsions che disin ch'al rive un grum di cjalt

dimarts, de maig 09, 2006

30 agns dal taramot

Ai 6 di Mai a colavin i 30 agns dal taramot che al à butât jù paîs intîrs. Jo no eri ancjemò nassût, ma dome a viodi lis imagjinis mi vegnin i sgrisui, e ancje o soi orgoliôs parcè che dut al è tornât come prime. Sperin di no dismenteâsi mai di ce che i furlans a àn fat come che fasin par tantis altris robis de nestre storie antighe.

dilluns, de maig 01, 2006

Incuintris

Al è incredibîl però come tu incuintris int simpatiche par câs. îr di sere o jeri in Place Sant Stiefin, lì des siet glesiis (e cun chest se cualchidun al sta leint al à forsit capît dulà che voi a torseon/studii...) o jeri sintât cuntun amì e cjacarant o vin cjatât un doi fantats dal puest (al è dificîl cjatâju, a son masse di fûr) e a la fin si sin divertûts. A son chestis lis robis che mi plasin. Ancje se chest al è un timp di polse, par cui al pues jessi par chest che mi soi divertût, i moments dûrs e àn di vignî. Ma, come che disin tal rèclame, life is now, so screw you up, carpe diem e vie di lunc