dimecres, de juny 21, 2006

Un cuatri dîs in patrie

Doman o torni dal vecjo Friûl. No viodi l'ore di sintâmi inte taverne e gjoldi un pôc di fresc, in citât no tu crodis trop cjalt che al bute sù l'asfalt e trop che tu ti scjinfis ancje a fâ dome cuatri pas. Po ben, o ai ancje robe di studiâ... vuê o ai fat un esam di eletroniche e sperin ben, cualsisei vôt al va ben, no mi free plui nuie de medie ma dome di finî... un ch'al scrîf cussì al à di jessi za agns che fâs la univ; invezit no, si pol dî che o ai pene scomençât. E je int che no samee preocupade di stâ ca dîs agns, e, no par jessi raziscj, ma un grum a son dal sud; jo no podi fâ cussì, mi samee di robâ, o ai gole di cjatâmi un lavôr, e comprâ une machine, pò magari une cjase (no scherzi, ma al è tipic di un furlan :D). plui che altri o vares voe di lâ vie de Italie, o sinti tancj che disin no a un lavôr tal forest: jo tra un lavôr tal forest e un in Italie no varès dubis; tra un tal forest e un in Friûl cualchi dubi, ma sielzares simpri il forest. Forsit vevi di lâ a fâ l'universitât in Austrie come che fasevin i vecjos...

dimarts, de juny 20, 2006

Friûl - Catalogne

Eh sì, a la fin al è rivât cualchidun, il mitic Dree... che mi à ancje metût tai leams dal sô blog che al è aromai une istituzion. Il fat al è che ancje Internet, come il mont, al è piçul, soredut pe lenghe furlane... no crôt che si rivedi ancjemò a cent sîts inte marilenghe... po ben, al è ancje par chist che o scrivi par furlan, se o oraressi fâ un blog seguit, I'd rather use english and perhaps I would have also tons of visits... ma chist invezit al è un diari personâl, un sfogo. Ma par restâ in argoment, plui mi informi sui catalans e plui ju invidi... ciert no si podin fâ paragons, lôr son un toc impuartant de Spagne, e son tancj, nô pôcs e masse fûr man... ma par esempli cuissà se viodarin mai un sît come VilaWeb - Diari Electrònic Independent, un gjornâl, ancje dome in rêt dut par furlan. Mah... si scugne crodigi, ma no lu viôt tal futûr, se no tu scomencis a insegnâ ai zovins a scrivi e a lei a scuele.
Intant il studi al va indevant, e sperin a rivedin ancje i risultâts... e che no sedin come chei de Italie, che e je suete e si alzin masse i comedons

dissabte, de juny 10, 2006

Balon

Aromai ca il clima al è in plen che dai mondiâi di balon in Gjermanie, ma se chês altris voltis o podevi cjalamiju in pâs sul divan, cumò a soi ancjemò a sudâ sui libris, e al larà indevant almancul par un mesut. Par fortune (me) che la RAI no à i bêçs par comprâ dutis lis partidis, par cui o sin a une partide ogni dì e vonde, ancje se mi romp lis balis che a decidin lôr ce mostrâ, dome parcè che zuie al Brasîl e àn di mostrâle. Mah, mi stoi simrpri interessant mancul al balon, miôr il basket o lis bunis vecjis machinis/motos; lì se zirin sols al mancul a riscjin il cûl, no dome un zenoli che si comede. E po no soi mai stât tant tifôs talian, ancje se i furlans a'nd àn judât un casin l'Italie, baste pensâ a Bearzot from Uanis, Friûl; cuissà magari a vignaran fûr ancje ca come in Spagne lis nazionals regjonals, mi plasarès viodi une selezion furlane. Starin a viodi, pò sigûr che cualchi bevude cui amîs si fasarà. E al è chel l'impuartant, nomo?