dijous, d’agost 09, 2007

feriis

Bon, soi in Friûl a rilassâmi un pôc dopo chest an dificil, fin ae fin di cheste setemane no fasi propi nuie. di lunis o vuei scomençâ a cjapâ sù alc, parcè che o varès di lâ un pôc ator tes prossimis setemanis (marchis/umbrie forsi e barcelone sigûr)... ca al è il bon vecjo 56k, cussì mi passe ancje la voie di navigâ che al è miôr cussi lei, zuie di basket, lâ un zîr a Grau (soi ancje avonde abronzât, dopo agns), etc, dutis chês robis che no si rive a fâ vie pal an. Al è cjalt ma no impussibil. Po cumò o ai ancje il nevotut culì, al è vivonon, ca di un pôc al scomence a cjaminâ e alore saran problemis. Però al è divertent. La robe che mi plâs fâ e je ancje cjalâ TeleCapodistria. E je une robe che mi mancje a Bologne, cul sport e lis notiziis alternativis. Chê altre dî o ai metût un pôc su un canâl sloven, di sere, e davin un film in lenghe origjinâl, cun sot titui in sloven, biel, e soredut, la publicitât là a durave si e no un minût. in prime serade. cuntun film. mi soi sintût un coion a vivi culì dulà che ti fasin cinc minûts di publicitât, e nissun film in lenghe origjinâl, e dopo a disin parcè che i talians a son ignorants e no san l'inglês. puars nô. se o ves plui timp mi metaressi a studiâ il sloven...