dimecres, de juliol 18, 2007

Uff... finût

Vuê ultin esam par cumò. Intun cjalt infernâl, o ai fat l'orâl. O vevi 22 tal scrit, dôs domandis (dimostrazions scritis) la prime perfete, la seconde mi mancjave l'ultin pas, ma instès decente. Risultât: 21. Cheste universitât e je propi un schifo, un tutor, tutôr, deficient, o cemût che lu vuelin clamâ, che ti da un vôt cussì, a voli. Po ben, aromai no mi free nuie, anzi mi à salvât l'estât chest esam. ancje la medie e pues lâ par sô cont, soi straconon. îr o ai regjistrât ricercje operative, altri esam di miarde, un 18, cul professôr che nus à fat spietâ un ore. Po mi dîs: mi dispiace di averle rovinato la media. No comment. Se o ai timp une di chestis zornadis o fasi une biele liste di ducj i esams, cemût che a son lâts, pro memoria futura. Mah. cumò fin a sabide, chill out in bologna, dopo relax in Friûl. Se no ves fisiche di fâ o sarès za laureât. Ma vuê o ai scuviert che laureâmi mi fâs pôre. Parcè? Parcè che no je finude. Dopo o scugni scomençâ la specialistiche. Jo o volarès cjapâmi un pôc di pause, lâ un pâr di mês ator, tipo a Londre, se no ca mi ven l'esauriment nervôs. Ma apene o ai acenât alc ai mei finanziadôrs :p ... za mi àn dit che o ai voie di piardi un an di bant. Che o ai di scomençâ subit. che o ai di provâ. che X a scomençât subit... che Y si sta laureant. Ma io soi strac. Cuasi cuasi o speri di ritardâ la lauree il plui possibil. Il limit massim al è Març: se mi laurei a Març, no podaran migo dimi di scomençâ subit? Boh boh boh super dubis. Îr di sere un bon azado cui argjentins, pecjât che no podevi rilassami masse che vuê o vevi l'esam. prest a tornaran ancje lôr a cjase. Cuissà ce che al vignarà. Un mandi ai blogarins che an comentât cumò ju zonti ca in bande

dimarts, de juliol 03, 2007

The land of perdition

Sì, o ai vude cheste impression la setemane pasade, o soi lât pe prime volte a Nova Gorica (Gurize gnove :-D) tal casinò. Juste par dâ un cuc, viodi cemût che al è... e al è come tal titul, plen di int (jere miercus, vie pe setemane, no dut plen ma parcè che il puest al è grant, ma la int a jere) e nuie, la grant part talians, tancj furlans, e ducj a tirâ fûr flichis, come che al dîs me nono. e o feveli di cjartis di 500€, che fin cumò o vevi viodût une o dôs voltis. Lì van vie come nuie. Robis di malâts. Jo tant cognossi cuasi par nuie chei zûcs... ma al jere ancje il manuâl di spiegazion! Ciert che il stât sloven al à di fâ un biel pôc di bêçs... e dut a neancje 30 km di ca di me... Po ben, a jerin sù in Friûl cun L., lu ai puartât un pôc ator, solits puescj, ancje su pes valadis dal Nadison, che a mi mi plasin tantonon, juste par mostrâi che il Friûl nol è dome plane. sin lâts fin a Savogne, biei puescj torni a dîlu. si sin divertûts, sin lâts ancje a Grau, soi rivât a brusâmi la muse cun dôs oris di soreli...Intant o ai cjapât 26 in lab di inzegnerie dal software, bon, ancje se no son chei esams che mi preocupin, ma chei no informatics. Doman o ai tornâ a fâ ricercje operative, po fisiche... ce balis. sperin ben. Par fortune al è un cjalt sopuartabil, un tic di aiarut, si tire indevant.
O ai viodût un coment di Giulia... graziis! a la fin lu torni a dî, chest blog al è come un diari lassât viert su la taule par cui che al passe e al vûl fermâsi... nuialtri.

A son ancje tornâts i argjentins... a son fuarts... o ai scugnût prestâ un pâr di barghessis, parcè che lis sôs lis à dismenteadis a... Tel Aviv :D... mah, doman di sere dopo dal esam, relax relax