Fin de session di zenâr

Un mesut che no scrivevi. O ai fat îr l'ultin esam, sperin che sedi lât ben. Però sai za che o ai passât un esam dûr, un dai doi plui dificii (chel altri al è chel di fisiche 2). Par cui soi content. Lis robis a van ben in chest cjamp. Tes vacancis, dal pont di viste privât a son ladis mancul ben. Soredut pal ultin. O varai di fâ un messaç di riepilogo dai miei Ultins passâts, par fâ un belanç. O soi cuasi deventât un espert di furlan e Internet, di consultâ cuant che si vûl meti sù un progjet di traduzion. E doi agns fa o savevi a malapene che al esisteve une grafie standard. Po ben, lunis a tornin a scomençâ lis lezions, chest periodi al è fondamentâl, se mi gjavi i esams indaûr ca di un an a Zenâr podaressi vê finût. Se no, al larà dut plui indevant.
Fûr a saran 15 grâts. cuntun aiarut che samee di jessi in Març/Avrîl; no pensi che a sedin stâts plui di 2-3 zornadis di frêt chest an. Ala fin mi sa che chê dal efiet sere e je vere, se no no si spieghe. Nuie nêf. Nuie ploie. Al è miôr trasferîsi plui a nord fin cuant che si rive. Ah, intes vacancis o ai ancje comprât un disc par furlan. Rap par cjargnel, di Dek Ill Ceesa. Bulo. Soi content di vê paiât 10€. Magari a fossin plui int come cheste.