Mandi estât

Sì, no je finude ma cuasi. Îr o soi lât al mâr, a Cervia. No jeri mai lât di chês bandis, cun dut chel che cjacarin. Judizi: mâr... come a Grau/Lignan. Nuie di speciâl, ma jerin un cuatri bielis ondis. Spiage ben atrezade, cun bielis sdrais, divertiments pai fruts, palestre, musiche e vie indevant. In Friûl tu pais un casin par vê cuasi nuie... e no vin nancje cuissà ce bielecis di mâr. Fin cuant che i todescs a vegnin, dopo si rangiaran. Comunque di sere al è ormai frêt. Jo o studii, simpri chês robis, ce coions. I esams indaûr a son chei piês, e cuant che son tancj a samein ancje di plui. O soi un tic avilît ma neancje tant, mi soi rilassât par chel a Avost, par dismenteâ dut chist, ma dopo tu stâs pôc par tornâ al pont di prime. Sabide e domenie Friuli DOC. O crodi di lâ sù, al è za doi agns o forsit trê che no voi... e je comerciâl come fieste però e je simpri furlane. E la nostalgjie e je simpri tante. CHiste e je une biele citât e dut, ma nuie al è come il puest dulà che tu sês nassût. E tu lu capissis dome cuant che tu vâs vie. Good night

Back to bizness

O soi tornât a la dure realtât, prime o dopo se o ai timp fasarai un resocont...par intant chestis ca a son cuatri riis che o ai butât ju intun esam fat pôc fâ (e lât mâl, pe cronache... no crodi che mi daran un 30 dome scrivint chestis robis :D):

Va in casin tu e la tô materie
va a fâ cualchi robe plui serie
chistis robis ca no lis doprin plui
ma tu tu continuis, par cui?

Mi insumii di un puest diviars,
di cualchi colinute su pal Cjars
ma dulintor o viodi cuatri muris
ch'a fasin dutis lis robis plui duris

Cjantussi alc a vôs basse
stant atent a no mostrâmi masse
buti jù chistis cuatri riis par furlan
tant il torment al finirà, mâl, ma durman

Vacancis, at last

Si, o ai siarât cuntun altri bon vôt par cui podi polsâ cumò... o voi un doi dîs in Umbrie e dopo un cuatri al mâr in Abruç. Po forsit mi butarai sul mâr nostran di Grau. Ciert che al è incredibil... ai 1 di Lui o jeri dut butât jù parcè che no saltave fûr nuie, cumò invezit o soi contenton. Miôr cussì. Ca il cjalt al è pardabon fuart, sui 36 grâts dopodimisdì, cul asfalt ch'al bute sù un grum. Bon cumò o sarai un mesut o plui cence Fastweb... in Friûl cul 56k mi samee di vê une biciclete invezit di une Ferrari... dute cuestion di abitudin. O varai cussì di lassâ un pôc stâ i progjets online, ma o crôt che il mont al larà indevant instès. O almancul speri. Mandi e buinis vacancis ai miei 4 letôrs (citazion dote di Alejandro Manzoni :D)

Lui sut, ma Lui fortunât

Lui fin cumò al è stât sut, ma fortunât. O ai cjapât doi trente e lode, in dôs materiis a vonde dificilis. Cumò miercus si finis, pò un mesut di relax no mi lu gjave nissun. Vuê pe prime volte si viodin i nûi e no il soreli. Bon a la fin il discors al è simpri chel, si sufrìs simpri sei pal cjalt che pal frêt. Intant o sin ancje campions dal mont, jo no ai fat tante fieste, ma soi content, àn zuiât a vonde ben, àn vût un biel cûl, e al è simpri biel bati i francês, che a'nd àn simpri di vê reson.

Int che fâs casin

Îr di sere mi veve vignût un biel nervôs, cun dute la int che passave sot dal barcon sunant il clacson e sberlant. Va ben un pôc però prime o dopo i si brusarà chel sunet no? Pò dut par une vitorie cuintri une scuadrute. Mah. Vuê par fortune al è un pôc mancul cjalt, al è un buerin biel. Martars speri di tornâ in Friûl a cjapâ un pôc di fresc, ancje se ca al è cjalt par dut. E no sai sarà parcè che soi za avilît di me parcè che tai ultins timps al va dut mâl, no voi indevant plui, ma la citât di estât mi samee cussì ...boh. Mi covanterès un pôc di fortune, che però no ai. O ai dulà che podares ancje fâ di mancul (un treno cu l'arie condizionade par dî). SFIGA GO AWAY PLEASE! Sperin ben di rivâ a mancul a gjoldi avost al mâr o dulà che o sarai